Կայքերի, անձնական և կորպորատիվ էջերի կոտրման ամենատարածված տարբերակն է գաղտնաբառերի հաջորդական փորձարկումը (brute force): Ինչքան ավելի պարզ և կարճ է ձեր գաղտնաբառը այնքան ավելի քիչ քանակությամբ փորձ է հարկավոր չարագործին այն գտնելու համար։
Հեշտ գաղտնաբառ՝ կոտրման կարճ ժամանակ։
Hive Systems-ը հաշվել է, թե ժամանակակից տեխնոլոգիաներով չարագործներին ինչքան ժամանակ է հարկավոր տարբեր երկարության ու բարդության գաղտնաբառերը կոտրելու համար։ Ահա աղյուսակը՝
| Գաղտնաբառի երկարությունը | Միայն թվեր | Միայն փոքրատառեր | Փոքրատառեր և մեծատառեր | Փոքրատառեր, մեծատառեր և թվեր | Փոքրատառեր, մեծատառեր, թվեր և սիմվոլներ |
|---|---|---|---|---|---|
| 4 | անմիջապես | անմիջապես | անմիջապես | անմիջապես | անմիջապես |
| 5 | անմիջապես | անմիջապես | անմիջապես | անմիջապես | անմիջապես |
| 6 | անմիջապես | անմիջապես | անմիջապես | 1 վրկ. | 5 վրկ. |
| 7 | անմիջապես | անմիջապես | 25 վրկ. | 1 րոպե | 6 րոպե |
| 8 | անմիջապես | 5 վրկ. | 22 րոպե | 1 ժամ | 8 ժամ |
| 9 | անմիջապես | 2 րոպե | 19 ժամ | 3 օր | 3 շաբաթ |
| 10 | անմիջապես | 58 րոպե | 1 ամիս | 7 ամիս | 5 տարի |
| 11 | 2 վրկ. | 1 օր | 5 տարի | 41 տարի | 400 տարի |
| 12 | 25 վրկ. | 3 շաբաթ | 300 տարի | անհնար է | անհնար է |
| 13 | 4 րոպե | 1 տարի | անհնար է | անհնար է | անհնար է |
| 14 | 41 րոպե | 51 տարի | անհնար է | անհնար է | անհնար է |
Աղյուսակում հաշվի առնված չեն ցանցի վրա ծախսված ժամանակը։ Ուշադրություն դարձրեք թե ինչպես գաղտնաբառում մեկ նիշ ավելացնելով կամ մի աստիճան այն բարդացնելով ծախսված ժամանակը կարող է ժամերից դառնալ ամիսներ։
Ինչպես ստեղծել ճիշտ գաղտնաբառ
Իրականում ճիշտ գաղտնաբառ ստեղծելու համար հարկավոր է հետևել ընդամենը երեք կանոնի։
1. Երկարություն և բարդություն
Ինչպես պարզ է դառնում աղյուսակից՝ գաղտնաբառը պետք է պարունակի առնվազն 9 նիշ, բայց ցանկալի է 11 կամ ավել։ Բայց նիշերի քանակը բավարար չէ։ Գաղտնաբառը պետք է պարունակի մեծատառ, փոքրատառ, թիվ և հատուկ սիմվոլ։
հատուկ սիմվոլը ընտրեք ստանդարտներից (!@#$%^&*()), քանի-որ կան կայքեր որոնք ավելի բարդ սիմվոլներ կարող են չընդունել։
2. Արգելված պարունակություն
Գաղտնաբառը ընդհանրապես ցանկալի չէ որ պարունակի իրական որևէ բառ կամ տարեթիվ, բայց կան բառեր որոնց օգտագործումը խստիվ արգելված է՝
- Անունը կամ ազգանունը
- Ծննդյան տարեթիվ կամ ամսաթիվ։
- Կայքի անունը որտեղ որ գրանցվում եք։
- Ձեր username-ում կամ էլ. հասցեում առկա բառերը։
Իսկ լավագույն տարբերակն է գեներացնել պատահական գաղտնաբառ և մոռանալ այս կանոնների մասին։ Դրա համար կան բազմաթիվ հարմար գործիքներ։
3. Մի կրկնվեք
Նույն գաղտնաբառը մի քանի կայքում օգտագործելու դեպքում դուք մի փոքր ավելացնում եք այն կոտրելու հավանականությունը։ Բայց առավել կարևոր է այն, որ մի կայքը կոտրելու դեպքում չարագործը անմիջապես կկարողանա կոտրել մնացած կայքերը որտեղ օգտագործվել է այդ գաղտնաբառը։